L’Academia estrena Terrén, una nueva coleición que va atropar los trabayos de calter etnolóxicu llendaos a un territoriu xeográficu específicu firmaos pola mesma persona y que se tienen asoleyao a lo llargo los años nes estremaes publicaciones de la institución.
D’esta miente, abre la coleición Vicente Rodríguez Hevia con La cultura tradicional en Llaviana. En cuatro capítulos, conformen estos testos un corpus pernecesariu pal entendimientu cultural, social, económicu y territorial del conceyu de Llaviana y reconocen al autor d’El Condao nel so llabor investigador. Nesti volume trátense los temes rellacionaos col espaciu cultural tradicional: los periodos de la güerta y la collecha, l’usu del horru como’l foru del pueblu, la toponimia menor, etc. A ello amiéstase un repasu históricu del aprovechamientu de los recursos del ríu y el monte y una descripción de les celebraciones del conceyu Llaviana.
Consulta’l llibru nel catálogu de l’ALLA: https://prebaserver.alladixital.org/productu/la-cultura-tradicional-en-llaviana/