Investigación y formación
XLIV Congresu Internacional de Filoloxía y Cultura Asturianes (CIFCA)
Portada |
El Congresu Internacional de Filoloxía y Cultura Asturianes (antigües Xornaes Internacionales d’Estudiu) ye l’actividá d’intercambéu de producción investigadora con más antigüedá nel ámbitu de la filoloxía asturiana y una de les que más ediciones cuenta dientro del espaciu científicu de la romanística. Celébrense na Facultá de Filosofía y Lletres de la Universidá d’Uviéu y tienen tres díes de duración.
La so finalidá ye amosar y coneutar los estudios d’asturianística al traviés d’un programa de ponencies, comunicaciones y presentaciones que s’anueva tolos años y que, dacuando, tien un enfoque monográficu. Esti Congresu Internacional ye, asina, el resultáu d’acomuñar el trabayu que tán desenvolviendo munches persones dende disciplines estremaes pero complementaries, na investigación de les lletres asturianes, seya d’un xeitu específicu o, bien, comparativu.
Direición: Ana María Cano González y María del Carmen Muñiz Cachón.
El Congresu Internacional de Filoloxía y Cultura Asturianes (CIFCA) realízase gracies a la collaboración de la Universidá d’Uviéu, al traviés del Alcuerdu Específicu d’Actividaes que tolos años robla cola Academia de la Llingua Asturiana.
Vinientes
Préstanos anunciar que’l «XLIV Congresu Internacional de Filoloxía y Cultura Asturianes (CIFCA)» va llevase alantre los díes 3, 4 y 5 de payares del 2026. El so programa, como tolos años, va xuntar actividaes de formatu estremáu: conferencies, presentaciones, conversaciones lliteraries y comunicaciones.
Amás, anguaño, ta previsto que la xornada del xueves 5 acueya un monográficu sobre’l piesllu del proyeutu internacional d’investigación Patronymica Romanica (PatRom), depués de cuatro décades de xera filolóxica onde la ciencia asturiana, al traviés de la Universidá d’Uviéu y l’Academia de la Llingua Asturiana, tuvo un papel destacáu.